aaj muqabla hai saKHt mir-e-sipah ke liye

aaj muqābla hai saḳht mīr-e-sipāh ke liye

ho ga.e sar ka.ī qalam ek kulāh ke liye

tāza-ruḳhī-e-kā.enāt DhūñD rahī hai aa.ina

justujū hai hazār meñ ek gavāh ke liye

khul hī gayā tilism-e-dost ain visāl meñ ki thī

ik shab-e-hijr zindagī lazzat-e-āh ke liye

ik shab-e-ḳhud-numā.ī meñ ismat-e-be-maqām ne

kitne savāl kar liye ramz-e-gunāh ke liye

sūrat-e-gard-e-kārvāñ hai ġham-e-manzil-e-jahāñ

ḳhvāb-e-junūn-e-tāza-kār chāhiye raah ke liye

ātish-e-kīmiyā-garāñ kaam na aa sakī koī

surma hai ḳhāk-e-dil mirī chashm-e-siyāh ke liye

merī ḳhud-āgahī bhī kī tere visāl ne talab

hijr-e-hazār-shab ke ba.ad ek gunāh ke liye

aaj muqabla hai saKHt mir-e-sipah ke liye

ho gae sar kai qalam ek kulah ke liye

taza-ruKHi-e-kaenat DhunD rahi hai aaina

justuju hai hazar mein ek gawah ke liye

khul hi gaya tilism-e-dost ain visal mein ki thi

ek shab-e-hijr zindagi lazzat-e-ah ke liye

ek shab-e-KHud-numai mein ismat-e-be-maqam ne

kitne sawal kar liye ramz-e-gunah ke liye

surat-e-gard-e-karwan hai gham-e-manzil-e-jahan

KHwab-e-junun-e-taza-kar chahiye rah ke liye

aatish-e-kimiya-garan kaam na aa saki koi

surma hai KHak-e-dil meri chashm-e-siyah ke liye

meri KHud-agahi bhi ki tere visal ne talab

hijr-e-hazar-shab ke baad ek gunah ke liye