aaj nazar-andaz hue to baat hai kya hairani ki

aaj nazar-andāz hue to baat hai kyā hairānī kī

aayat jaise log mile aur ham ne rū-gardānī kī

kitne ruup kī dhuup hamāre siine par lahrā.ī thī

ham ne chādar khīñch lī ḳhud par ham ne tan-āsānī kī

kyā karte ik husn-e-yūsuf aur zuleḳhā kyā bante

ham ne donoñ lutf uThā.e ham ne qissa-ḳhvānī kī

dariyāoñ se milte-julte log rahe haiñ pahlū meñ

phir bhī ham ne bhar ke rakkhī apnī chhāgal paanī kī

pahle maiñ ne hukm diyā thā bas mujh ko mahsūs karo

baad meñ us ko jism banāyā jis ne nā-farmānī kī

aaj nazar-andaz hue to baat hai kya hairani ki

aayat jaise log mile aur hum ne ru-gardani ki

kitne rup ki dhup hamare sine par lahrai thi

hum ne chadar khinch li KHud par hum ne tan-asani ki

kya karte ek husn-e-yusuf aur zuleKHa kya bante

hum ne donon lutf uThae hum ne qissa-KHwani ki

dariyaon se milte-julte log rahe hain pahlu mein

phir bhi hum ne bhar ke rakkhi apni chhagal pani ki

pahle main ne hukm diya tha bas mujh ko mahsus karo

baad mein us ko jism banaya jis ne na-farmani ki