آج نظروں سے عجب لطف کا منظر گزرا

آج نظروں سے عجب لطف کا منظر گزرا

کوئی شیشہ نہیں کھڑکی میں تو پتھر گزرا

سرد السائی ہوئی رات میں چپکے چپکے

آج یہ کون مری روح کو چھو کر گزرا

پھول ہی پھول تھے بکھرے ہوئے تا حد نظر

میں تری یاد میں جس راہ سے ہو کر گزرا

ابر کے ٹکڑے تھرکتے ہیں فضا میں ہر سو

زلف بکھراتا ہوا کون کھلے سر گزرا

درد کا دیپ جلاتے ہوئے خاموشی سے

میرا ہی سایہ مرے پاس سے ہو کر گزرا

نفسی نفسی کا یہ عالم ہے کہ میرا ہی وجود

میرے حالات سے خود آنکھ بچا کر گزرا

کیا کہیں رندؔ کہ اس دور ضیا پرور میں

کتنی تاریک خلاؤں سے مقدر گزرا