aaj nazron se ajab lutf ka manzar guzra

aaj nazroñ se 'ajab lutf kā manzar guzrā

koī shīsha nahīñ khiḌkī meñ to patthar guzrā

sard alsā.ī huī raat meñ chupke chupke

aaj ye kaun mirī ruuh ko chhū kar guzrā

phuul hī phuul the bikhre hue tā-hadd-e-nazar

maiñ tirī yaad meñ jis raah se ho kar guzrā

abr ke TukḌe thirakte haiñ fazā meñ har-sū

zulf bikhrātā huā kaun khule sar guzrā

dard kā diip jalāte hue ḳhāmoshī se

merā hī saaya mire paas se ho kar guzrā

nafsī-nafsī kā ye 'ālam hai ki merā hī vujūd

mere hālāt se ḳhud aañkh bachā kar guzrā

kyā kaheñ 'rind' ki is daur-e-ziyā-parvar meñ

kitnī tārīk ḳhalāoñ se muqaddar guzrā

aaj nazron se 'ajab lutf ka manzar guzra

koi shisha nahin khiDki mein to patthar guzra

sard alsai hui raat mein chupke chupke

aaj ye kaun meri ruh ko chhu kar guzra

phul hi phul the bikhre hue ta-hadd-e-nazar

main teri yaad mein jis rah se ho kar guzra

abr ke TukDe thirakte hain faza mein har-su

zulf bikhraata hua kaun khule sar guzra

dard ka dip jalate hue KHamoshi se

mera hi saya mere pas se ho kar guzra

nafsi-nafsi ka ye 'alam hai ki mera hi wujud

mere haalat se KHud aankh bacha kar guzra

kya kahen 'rind' ki is daur-e-ziya-parwar mein

kitni tarik KHalaon se muqaddar guzra