آج پھر درد ہے احساس ہے تنہائی ہے

آج پھر درد ہے احساس ہے تنہائی ہے

اور ایسے میں تری یاد چلی آئی ہے

اور اب پیار کو تم کوستے پھرتے کیوں ہو

میں نہ کہتا تھا مرے دوست وہاں کھائی ہے

پھول ہیں یا یہ ترے لب ہیں کھلے شاخوں پر

شاخ کا خم ہے کہ جیسے تری انگڑائی ہے

ایسا لگتا ہے یہ ویرانی ہے ساتھی میری

ایسا لگتا ہے یہ سناٹا مرا بھائی ہے

اس کی خاطر مری دھڑکن بھی ہوئی بے قابو

ایک لڑکی جو مرے نام پہ شرمائی ہے

تیری صورت نے بھرا رنگ مرے لمحوں میں

تیری باتوں نے مری شام یہ مہکائی ہے

واپسی کا کوئی رستہ نہیں ملتا عاطفؔ

زندگی جانے یہ کس موڑ مجھے لائی ہے