aaj sunte hain ki mere ghar wo yar aane ko hai

aaj sunte haiñ ki mere ghar vo yaar aane ko hai

apne qaabū meñ dil-e-be-iḳhtiyār aane ko hai

bulbuleñ haiñ naġhma-zan phūlā huā hai bāġhbāñ

baaġh meñ khiltī haiñ kaliyāñ kyā bahār aane ko hai

dekhtā huuñ chashm-e-nargis aaj sharmā.ī huī

kyā tumhārī diid kā ummīd-vār aane ko hai

misl-e-tasvīr-e-ḳhayālī murġh-e-bustāñ haiñ ḳhamosh

bāġhbāñ gulshan meñ koī dil-figār aane ko hai

ai 'jamīla' fasl-e-gul aa.ī chalā sahrā ko maiñ

mehmāñ ban kar mire talvoñ meñ ḳhaar aane ko hai

aaj sunte hain ki mere ghar wo yar aane ko hai

apne qabu mein dil-e-be-iKHtiyar aane ko hai

bulbulen hain naghma-zan phula hua hai baghban

bagh mein khilti hain kaliyan kya bahaar aane ko hai

dekhta hun chashm-e-nargis aaj sharmai hui

kya tumhaari did ka ummid-war aane ko hai

misl-e-taswir-e-KHayali murgh-e-bustan hain KHamosh

baghban gulshan mein koi dil-figar aane ko hai

ai 'jamila' fasl-e-gul aai chala sahra ko main

mehman ban kar mere talwon mein KHar aane ko hai