aaj tabir KHwabon ki hum pa gae

aaj ta.abīr ḳhvāboñ kī ham pā ga.e

lo jinheñ chāhte the vo ḳhud aa ga.e

jab ishāra nazar kā tirī pā ga.e

be-muhābā zamāne se Takrā ga.e

kis ḳhushī se uThāyā hai har ek ġham

dost jab se tirī ham razā pā ga.e

ab to jalve hī jalve nigāhoñ meñ haiñ

tum tasavvur kī duniyā pe yuuñ chhā ga.e

ḳhud zamāna bhī ab mehrbāñ ho gayā

ham ġham-e-dost jab se tujhe pā ga.e

aa rahā thā jafāoñ meñ mujh ko mazā

jaane kyā soch kar ab vo baaz aa ga.e

phuul murjhā ga.e aur gire shāḳh se

ek pal kī hañsī kī sazā pā ga.e

kyoñ fareb-e-vafā bhī na rahne diyā

ye sahārā bhī jiine kā tum Dhā ga.e

e'tibār un ke va.adoñ kā kab thā hameñ

ham ḳhushī se ye dhoke magar khā ga.e

vo jo khelā kiye mere dil kā shikār

aaj vo apne hī daam meñ aa ga.e

dil kī barbādiyoñ kā gila jin se thā

aaj phir un kī bātoñ meñ ham aa ga.e

ek 'habīb' us se pahle the ham ajnabī

dard de kar mujhe aap apnā ga.e

aaj tabir KHwabon ki hum pa gae

lo jinhen chahte the wo KHud aa gae

jab ishaara nazar ka teri pa gae

be-muhaba zamane se Takra gae

kis KHushi se uThaya hai har ek gham

dost jab se teri hum raza pa gae

ab to jalwe hi jalwe nigahon mein hain

tum tasawwur ki duniya pe yun chha gae

KHud zamana bhi ab mehrban ho gaya

hum gham-e-dost jab se tujhe pa gae

aa raha tha jafaon mein mujh ko maza

jaane kya soch kar ab wo baz aa gae

phul murjha gae aur gire shaKH se

ek pal ki hansi ki saza pa gae

kyon fareb-e-wafa bhi na rahne diya

ye sahaara bhi jine ka tum Dha gae

e'tibar un ke wadon ka kab tha hamein

hum KHushi se ye dhoke magar kha gae

wo jo khela kiye mere dil ka shikar

aaj wo apne hi dam mein aa gae

dil ki barbaadiyon ka gila jin se tha

aaj phir un ki baaton mein hum aa gae

ek 'habib' us se pahle the hum ajnabi

dard de kar mujhe aap apna gae