آج تعبیر خوابوں کی ہم پا گئے

آج تعبیر خوابوں کی ہم پا گئے

لو جنہیں چاہتے تھے وہ خود آ گئے

جب اشارہ نظر کا تری پا گئے

بے محابا زمانے سے ٹکرا گئے

کس خوشی سے اٹھایا ہے ہر ایک غم

دوست جب سے تری ہم رضا پا گئے

اب تو جلوے ہی جلوے نگاہوں میں ہیں

تم تصور کی دنیا پہ یوں چھا گئے

خود زمانہ بھی اب مہرباں ہو گیا

ہم غم دوست جب سے تجھے پا گئے

آ رہا تھا جفاؤں میں مجھ کو مزا

جانے کیا سوچ کر اب وہ باز آ گئے

پھول مرجھا گئے اور گرے شاخ سے

ایک پل کی ہنسی کی سزا پا گئے

کیوں فریب وفا بھی نہ رہنے دیا

یہ سہارا بھی جینے کا تم ڈھا گئے

اعتبار ان کے وعدوں کا کب تھا ہمیں

ہم خوشی سے یہ دھوکے مگر کھا گئے

وہ جو کھیلا کئے میرے دل کا شکار

آج وہ اپنے ہی دام میں آ گئے

دل کی بربادیوں کا گلہ جن سے تھا

آج پھر ان کی باتوں میں ہم آ گئے

ایک حبیبؔ اس سے پہلے تھے ہم اجنبی

درد دے کر مجھے آپ اپنا گئے