آج تلاشی لی ہے ہم نے روم کے کونے کونے کی

آج تلاشی لی ہے ہم نے روم کے کونے کونے کی

سچی جھوٹی خبر ملی تھی اک تصویر کے ہونے کی

ہر شب نیند سے خالی آنکھیں آنکھوں پر خوابوں کا بوجھ

اور جھروکے سے جھانکے ہے خواہش چین سے سونے کی

کیسے اس سے نین ملے تھے وہ چھوڑو یہ بات سنو

مجھ بزدل میں کیسے آئی ہمت اس کو کھونے کی

جان پہ جسم کی ٹوٹی پھوٹی مورت بوجھ بڑھاتی ہے

یا رب مجھ میں طاقت رکھ دے اپنا پتلا ڈھونے کی

میری ہنسی پر کان لگا کر سننے والے سن کے بتا

دور کہیں سے آتی ہے آواز کسی کے رونے کی