aaj tanhai mein is dil ko jala kar dekhun

aaj tanhā.ī meñ is dil ko jalā kar dekhūñ

aur phir jaltā diyā ḳhud hī bujhā kar dekhūñ

zindagī tere liye raqs kiyā hai kitnā

dil ye kahtā hai ki ab tujh ko nachā kar dekhūñ

ḳhud hī tayyār karūñ kachchā ghaḌā maiñ apnā

aur phir ḳhud ko hī dariyā meñ bahā kar dekhūñ

kisī jangal se guzarte hue gum ho jā.ūñ

ban ke darvesh maiñ ḳhud ko bhī bhulā kar dekhūñ

tū nahīñ paas to phir kyoñ tujhe mahsūs karūñ

terī ḳhushbū meñ base ḳhat bhī jalā kar dekhūñ

ab chalī jā.ūñ sarāboñ ke ta.āqub meñ kahīñ

reg dar reg maiñ sahrā meñ nahā kar dekhūñ

raat dariyā meñ bahā aa.ī maiñ saarī nazmeñ

vo hunar kyā hai jise sab ko sunā kar dekhūñ

aaj tanhai mein is dil ko jala kar dekhun

aur phir jalta diya KHud hi bujha kar dekhun

zindagi tere liye raqs kiya hai kitna

dil ye kahta hai ki ab tujh ko nacha kar dekhun

KHud hi tayyar karun kachcha ghaDa main apna

aur phir KHud ko hi dariya mein baha kar dekhun

kisi jangal se guzarte hue gum ho jaun

ban ke darwesh main KHud ko bhi bhula kar dekhun

tu nahin pas to phir kyon tujhe mahsus karun

teri KHushbu mein base KHat bhi jala kar dekhun

ab chali jaun sarabon ke taaqub mein kahin

reg dar reg main sahra mein naha kar dekhun

raat dariya mein baha aai main sari nazmen

wo hunar kya hai jise sab ko suna kar dekhun