aaj tum apni kaho meri kahani phir kabhi

aaj tum apnī kaho merī kahānī phir kabhī

shaam shāyad ab na ho jānāñ suhānī phir kabhī

vasl ke shāhid rahe bhañvre kalī sab shaam ke

shaam kī ahl-e-jahāñ sun tarjumānī phir kabhī

baat ashkoñ ne kahī ḳhāmosh ham donoñ rahe

jhuum ke bolī ghaTā barse na paanī phir kabhī

muuñd ke āñkheñ use dekhā karūñ ḳhvāhish mirī

shauq-e-dīda bas abhī shauq-e-nihānī phir kabhī

giit gaanā 'ishq meñ hai paar jaanā 'ishq se

dekh luuñ jī-bhar use ye lan-tarānī phir kabhī

ye tamāsha zindagī kā ḳhatm hogā kyā kabhī

tham zarā kar 'ishq ab bāteñ jahānī phir kabhī

pheñk de saarī kitābeñ 'ishq kar ham se zarā

chhoḌ rāñjhā hiir ko qissa kahānī phir kabhī

aaj tum apni kaho meri kahani phir kabhi

sham shayad ab na ho jaanan suhani phir kabhi

wasl ke shahid rahe bhanwre kali sab sham ke

sham ki ahl-e-jahan sun tarjumani phir kabhi

baat ashkon ne kahi KHamosh hum donon rahe

jhum ke boli ghaTa barse na pani phir kabhi

mund ke aankhen use dekha karun KHwahish meri

shauq-e-dida bas abhi shauq-e-nihani phir kabhi

git gana 'ishq mein hai par jaana 'ishq se

dekh lun ji-bhar use ye lan-tarani phir kabhi

ye tamasha zindagi ka KHatm hoga kya kabhi

tham zara kar 'ishq ab baaten jahani phir kabhi

phenk de sari kitaben 'ishq kar hum se zara

chhoD ranjha hir ko qissa kahani phir kabhi