aaj un ka mizaj barham hai

aaj un kā mizāj barham hai

yā muqaddar meñ ek nayā ḳham hai

chalte chalte maiñ thak gayā lekin

raat baaqī hai raushnī kam hai

koī tanhā.ī sī hai tanhā.ī

chār-sū ek hū kā aalam hai

saaqī chup-chāp mai-kadā suunā

saaz kī lai bhī aaj maddham hai

daaġh dil ke dikhā.ūñ maiñ kis ko

apnā apnā har ek kā ġham hai

dil ke ā.īne meñ jahāñ dekhā

goyā dil ek sāġhar-e-jam hai

cholī dāman kā saath hai un kā

zindagī hai jahāñ vahāñ ġham hai

āshiyāne kā ab ḳhudā-hāfiz

bāġhbāñ kā mizāj barham hai

kaun ḳhush-baḳht aaj yaad aayā

aañkh kyoñ ye tumhārī pur-nam hai

aate hoñge 'habīb' vo shāyad

dard pahle se aaj kuchh kam hai

aaj un ka mizaj barham hai

ya muqaddar mein ek naya KHam hai

chalte chalte main thak gaya lekin

raat baqi hai raushni kam hai

koi tanhai si hai tanhai

chaar-su ek hu ka aalam hai

saqi chup-chap mai-kada suna

saz ki lai bhi aaj maddham hai

dagh dil ke dikhaun main kis ko

apna apna har ek ka gham hai

dil ke aaine mein jahan dekha

goya dil ek saghar-e-jam hai

choli daman ka sath hai un ka

zindagi hai jahan wahan gham hai

aashiyane ka ab KHuda-hafiz

baghban ka mizaj barham hai

kaun KHush-baKHt aaj yaad aaya

aankh kyon ye tumhaari pur-nam hai

aate honge 'habib' wo shayad

dard pahle se aaj kuchh kam hai