aaj yun mujhse mila hai ki KHafa ho jaise

aaj yuuñ mujh se milā hai ki ḳhafā ho jaise

us kā ye husn bhī kuchh merī ḳhatā ho jaise

vahī māyūsī kā aalam vahī naumīdī kā rañg

zindagī bhī kisī muflis kī duā ho jaise

kabhī ḳhāmoshī bhī yuuñ boltī hai pyaar ke bol

koī ḳhāmoshī meñ bhī naġhma-sarā ho jaise

harf-e-dushnām se yuuñ us ne navāzā ham ko

ye malāmat hī mohabbat kā sila ho jaise

is takalluf se sitam ham pe ravā rakhtā hai

ye bhī minjumla-e-ādāb-e-vafā ho jaise

ġham-e-ayyām pe yuuñ ḳhush haiñ tire dīvāne

ġham-e-ayyām bhī ik terī adā ho jaise

bandagī ham ko to aa.ī ki na aa.ī lekin

husn yuuñ ruuTh gayā hai ki ḳhudā ho jaise

aaj yun mujh se mila hai ki KHafa ho jaise

us ka ye husn bhi kuchh meri KHata ho jaise

wahi mayusi ka aalam wahi naumidi ka rang

zindagi bhi kisi muflis ki dua ho jaise

kabhi KHamoshi bhi yun bolti hai pyar ke bol

koi KHamoshi mein bhi naghma-sara ho jaise

harf-e-dushnam se yun us ne nawaza hum ko

ye malamat hi mohabbat ka sila ho jaise

is takalluf se sitam hum pe rawa rakhta hai

ye bhi minjumla-e-adab-e-wafa ho jaise

gham-e-ayyam pe yun KHush hain tere diwane

gham-e-ayyam bhi ek teri ada ho jaise

bandagi hum ko to aai ki na aai lekin

husn yun ruTh gaya hai ki KHuda ho jaise