aaj zaKHmon ki tarjumani mein

aaj zaḳhmoñ kī tarjumānī meñ

tum ko paayā har ik ma'ānī meñ

dekh mat yuuñ tū muskurā ke mujhe

pheñk patthar na Thahre paanī meñ

kuchh to sach ho ki e'tibār karūñ

jhol hī jhol haiñ kahānī meñ

ye sazā is liye milī hai ki ham

ek sach kah ga.e ravānī meñ

ab vahī zindagī kā hāsil hai

bach gayā thā jo rā.egānī meñ

tum ho mafhūm shā'irī kā mirī

tum ho uulā meñ tum hī saanī meñ

us ne jo likh diyā so jiite haiñ

ham to kirdār haiñ kahānī meñ

aaj zaKHmon ki tarjumani mein

tum ko paya har ek ma'ani mein

dekh mat yun tu muskura ke mujhe

phenk patthar na Thahre pani mein

kuchh to sach ho ki e'tibar karun

jhol hi jhol hain kahani mein

ye saza is liye mili hai ki hum

ek sach kah gae rawani mein

ab wahi zindagi ka hasil hai

bach gaya tha jo raegani mein

tum ho mafhum sha'iri ka meri

tum ho ula mein tum hi sani mein

us ne jo likh diya so jite hain

hum to kirdar hain kahani mein