aaKHir-e-kar yahi uzr jafa ka nikla

āḳhir-e-kār yahī uzr jafā kā niklā

jurm aur jurm bhī ik umr-e-vafā kā niklā

os meñ Duub ke jis tarah nikhartā hai gulāb

sharm se aur sivā husn adā kā niklā

kyā karī hai ki jab dar pe tire aa baiThā

āstīñ se na kabhī haath gadā kā niklā

jo duā māñgī hai auroñ hī kī ḳhātir māñgī

hausla aaj mire dast-e-duā kā niklā

shauq-e-manzil hī liye uTh ga.e jaane vaale

āshnā ek na āvāz-e-darā kā niklā

jab tū hī tū hai to phir ġhaib o huzūrī kaisī

ek hī rañg baqā aur fanā kā niklā

aaKHir-e-kar yahi uzr jafa ka nikla

jurm aur jurm bhi ek umr-e-wafa ka nikla

os mein Dub ke jis tarah nikharta hai gulab

sharm se aur siwa husn ada ka nikla

kya kari hai ki jab dar pe tere aa baiTha

aastin se na kabhi hath gada ka nikla

jo dua mangi hai auron hi ki KHatir mangi

hausla aaj mere dast-e-dua ka nikla

shauq-e-manzil hi liye uTh gae jaane wale

aashna ek na aawaz-e-dara ka nikla

jab tu hi tu hai to phir ghaib o huzuri kaisi

ek hi rang baqa aur fana ka nikla