aaKHir is zist ke tufan se guzar jaana hai

āḳhir is ziist ke tūfāñ se guzar jaanā hai

mauj ban kar hameñ us paar utar jaanā hai

toḌ dī maiñ ne to is moḌ pe zanjīr-e-nafas

ai mirī ziist batā tujh ko kidhar jaanā hai

ḳhvāh tauhīn-e-chaman ho ki ho tauqīr-e-chaman

nik.hat-e-gul ko bahar-hāl bikhar jaanā hai

aa.ī hai shām-e-yaqīñ kitne taqāze le kar

ik parinde kī tarah ham ko bhī ghar jaanā hai

maiñ na likkhūñgā kabhī 'āriz-o-lab ke qisse

maiñ ne is qaid ko tauhīn-e-hunar jaanā hai

vo mire paas na aa.e na mire saath chale

jis ko do chaar qadam chal ke Thahar jaanā hai

koī jaada hai na manzil hai nazar meñ 'jagdīsh'

ab isī soch meñ baiThā huuñ kidhar jaanā hai

aaKHir is zist ke tufan se guzar jaana hai

mauj ban kar hamein us par utar jaana hai

toD di main ne to is moD pe zanjir-e-nafas

ai meri zist bata tujh ko kidhar jaana hai

KHwah tauhin-e-chaman ho ki ho tauqir-e-chaman

nikhat-e-gul ko bahar-haal bikhar jaana hai

aai hai sham-e-yaqin kitne taqaze le kar

ek parinde ki tarah hum ko bhi ghar jaana hai

main na likkhunga kabhi 'ariz-o-lab ke qisse

main ne is qaid ko tauhin-e-hunar jaana hai

wo mere pas na aae na mere sath chale

jis ko do chaar qadam chal ke Thahar jaana hai

koi jada hai na manzil hai nazar mein 'jagdish'

ab isi soch mein baiTha hun kidhar jaana hai