aaKHir suKHan tamam kiya is dua ke sath

āḳhir suḳhan tamām kiyā is duā ke saath

rahnā guloñ ke beach mahaknā havā ke saath

ik be-kanār hijr mirī ruuh meñ muqīm

ik be-panāh ḳhauf mirī iltijā ke saath

ik be-yaqīn raat mirī raat kī sharīk

ik be-dayār shaam dil-e-nā-rasā ke saath

ik barg-e-ḳhushk shāḳh se girne kā muntazir

aur merā jism kaañp rahā hai havā ke saath

sahrā meñ khīñchtī hai mujhe ḳhvāhish-e-qarār

sahrā ko khīñchtā huuñ maiñ zanjīr-e-pā ke saath

āñkhoñ meñ merī rañg ke dariyā utaar kar

chehre ko us ne pher liyā kis adā ke saath

dil kī girah-kushā.ī faqat shart hai 'razī'

khul jā.egā vo jism to band-e-qabā ke saath

aaKHir suKHan tamam kiya is dua ke sath

rahna gulon ke beach mahakna hawa ke sath

ek be-kanar hijr meri ruh mein muqim

ek be-panah KHauf meri iltija ke sath

ek be-yaqin raat meri raat ki sharik

ek be-dayar sham dil-e-na-rasa ke sath

ek barg-e-KHushk shaKH se girne ka muntazir

aur mera jism kanp raha hai hawa ke sath

sahra mein khinchti hai mujhe KHwahish-e-qarar

sahra ko khinchta hun main zanjir-e-pa ke sath

aankhon mein meri rang ke dariya utar kar

chehre ko us ne pher liya kis ada ke sath

dil ki girah-kushai faqat shart hai 'razi'

khul jaega wo jism to band-e-qaba ke sath