aaKHirash kaun hua nala-kunan aaKHir-e-shab

āḳhirash kaun huā nālā-kunāñ āḳhir-e-shab

chīḳh uThā dard se har pīr-o-javāñ āḳhir-e-shab

phir sajī bazm chhalakne lage mīnā-o-ayāġh

daf.atan jaag uThā dard-e-nihāñ āḳhir-e-shab

shaam hī se jo añdheroñ se rahī garm-e-sitez

bujh ga.ī sham.a vahī de ke dhuāñ āḳhir-e-shab

āsmāñ kaañp uThā aur zamīñ tharrā.ī

qissa-e-ġham jo kiyā ham ne bayāñ āḳhir-e-shab

pahlū-e-dard se ik āh-e-sharar-bār uThī

chashm-e-ḳhūnāb huī shoa.la-fishāñ āḳhir-e-shab

band darvāze pe dī bād-e-sabā ne dastak

tere aane kā huā dil ko gumāñ āḳhir-e-shab

kulfat-e-hijr kā qissa baḌā tūlānī thā

ham sunāte bhī to suntā vo kahāñ āḳhir-e-shab

mere ham-dam mire dam-sāz mirī jān-e-hayāt

yuuñ mujhe chhoḌ ke jaate ho kahāñ āḳhir-e-shab

jalva-gar kaun huā mere shabistāñ meñ 'niyāz'

jhuum uThā vajd meñ har kaun-o-makāñ āḳhir-e-shab

aaKHirash kaun hua nala-kunan aaKHir-e-shab

chiKH uTha dard se har pir-o-jawan aaKHir-e-shab

phir saji bazm chhalakne lage mina-o-ayagh

dafatan jag uTha dard-e-nihan aaKHir-e-shab

sham hi se jo andheron se rahi garm-e-sitez

bujh gai shama wahi de ke dhuan aaKHir-e-shab

aasman kanp uTha aur zamin tharrai

qissa-e-gham jo kiya hum ne bayan aaKHir-e-shab

pahlu-e-dard se ek aah-e-sharar-bar uThi

chashm-e-KHunab hui shoala-fishan aaKHir-e-shab

band darwaze pe di baad-e-saba ne dastak

tere aane ka hua dil ko guman aaKHir-e-shab

kulfat-e-hijr ka qissa baDa tulani tha

hum sunate bhi to sunta wo kahan aaKHir-e-shab

mere ham-dam mere dam-saz meri jaan-e-hayat

yun mujhe chhoD ke jate ho kahan aaKHir-e-shab

jalwa-gar kaun hua mere shabistan mein 'niyaz'

jhum uTha wajd mein har kaun-o-makan aaKHir-e-shab