aaKHirash mar hi gaya yaKH-bastagi sahta hua

āḳhirash mar hī gayā yaḳh-bastagī sahtā huā

vo jo zinda pal mirī muTThī meñ thā jakḌā huā

ab kisī ko dekhnā un ko gavārā hī nahīñ

dekh kar tujh ko zamāne bhar se dil andhā huā

har-bun-e-mū gosh-bar-āvāz hai us ke liye

vo magar ḳhāmosh merī har sadā suntā huā

par salāmat haiñ magar phir bhī vo uḌ saktā nahīñ

ik parinda canvas par kab se hai baiThā huā

vaqt ke saare sitam ham ne sahe mil kar to phir

chāñd mere saath āḳhir kyuuñ nahīñ būḌhā huā

jaan kar apnā hī ghar ab dard rahtā hai yahāñ

dil ko ḳhālī us kī ḳhātir to na thā rakkhā huā

yuuñ musallat zindagī kar dī ga.ī a.asāb par

bojh ye Dhone meñ shal ehsās kā kandhā huā

ho ga.e tahlīl sab manzar chhuā jab aa.ina

khul gayā ye bhed aks-e-ḳhvāb thā phailā huā

aaKHirash mar hi gaya yaKH-bastagi sahta hua

wo jo zinda pal meri muTThi mein tha jakDa hua

ab kisi ko dekhna un ko gawara hi nahin

dekh kar tujh ko zamane bhar se dil andha hua

har-bun-e-mu gosh-bar-awaz hai us ke liye

wo magar KHamosh meri har sada sunta hua

par salamat hain magar phir bhi wo uD sakta nahin

ek parinda canwas par kab se hai baiTha hua

waqt ke sare sitam hum ne sahe mil kar to phir

chand mere sath aaKHir kyun nahin buDha hua

jaan kar apna hi ghar ab dard rahta hai yahan

dil ko KHali us ki KHatir to na tha rakkha hua

yun musallat zindagi kar di gai aasab par

bojh ye Dhone mein shal ehsas ka kandha hua

ho gae tahlil sab manzar chhua jab aaina

khul gaya ye bhed aks-e-KHwab tha phaila hua