aaKHiri gaDi guzarne ki sada bhi aa gai

āḳhirī gaaḌī guzarne kī sadā bhī aa ga.ī

so raho be-ḳhvāb āñkho! raat aadhī aa ga.ī

zindagī se siikh liiñ ham ne bhī duniyā-dāriyāñ

rafta rafta tum meñ bhī mauqa.a-parastī aa ga.ī

sāda-lauhī den jo qasbe kī thī ruḳhsat huī

shahr aanā thā ki is meñ hoshiyārī aa ga.ī

ham mile the jaane kyā āfat-zada rūheñ liye

guftugū auroñ kī thī aapas meñ talḳhī aa ga.ī

apne hī gaañv kī sarhad par pahuñch kar aaj ham

pūchhte haiñ ham-safar! ye kaun bastī aa ga.ī

ab na zauq-e-rah-navardī hai na lutf-e-māñdgī

aisā lagtā hai ki manzil par savārī aa ga.ī

tark kyuuñ karte nahīñ ho kārobār-e-ārzū

'ḳhānqāhī' ab to bāloñ meñ safedī aa ga.ī

aaKHiri gaDi guzarne ki sada bhi aa gai

so raho be-KHwab aankho! raat aadhi aa gai

zindagi se sikh lin hum ne bhi duniya-dariyan

rafta rafta tum mein bhi mauqa-parasti aa gai

sada-lauhi den jo qasbe ki thi ruKHsat hui

shahr aana tha ki is mein hoshiyari aa gai

hum mile the jaane kya aafat-zada ruhen liye

guftugu auron ki thi aapas mein talKHi aa gai

apne hi ganw ki sarhad par pahunch kar aaj hum

puchhte hain ham-safar! ye kaun basti aa gai

ab na zauq-e-rah-nawardi hai na lutf-e-mandgi

aisa lagta hai ki manzil par sawari aa gai

tark kyun karte nahin ho karobar-e-arzu

'KHanqahi' ab to baalon mein safedi aa gai