aaKHiri zarb dil par lagate hue

āḳhirī zarb dil par lagāte hue

kaun ruḳhsat huā muskurāte hue

un kī dahlīz tak ham ga.e to magar

dastakeñ rāstoñ meñ luTāte hue

kah ga.ī thī sabā ye mire kaan meñ

phir idhar ā.ūñgī āte-jāte hue

dil lagāne ko saarā jahāñ thā magar

sochtā kaun hai dil lagāte hue

zindagī kī tavālat kā 'uqda khulā

ret par ik gharauñdā banāte hue

kuchh sitāre the raushan jabīñ par mirī

tum ne dekhā nahīñ jhilmilāte hue

kitne rishtoñ kā maiñ ne bharam rakh liyā

ik ta'alluq se dāman chhuḌāte hue

kitne hī raaz sab par 'ayāñ ho ga.e

ik tirā rāz-e-ulfat chhupāte hue

yuuñ guzartā rahā kārvān-e-hayāt

ḳhud se apnā ta'āruf karāte hue

aaKHiri zarb dil par lagate hue

kaun ruKHsat hua muskuraate hue

un ki dahliz tak hum gae to magar

dastaken raston mein luTate hue

kah gai thi saba ye mere kan mein

phir idhar aaungi aate-jate hue

dil lagane ko sara jahan tha magar

sochta kaun hai dil lagate hue

zindagi ki tawalat ka 'uqda khula

ret par ek gharaunda banate hue

kuchh sitare the raushan jabin par meri

tum ne dekha nahin jhilmilate hue

kitne rishton ka main ne bharam rakh liya

ek ta'alluq se daman chhuDate hue

kitne hi raaz sab par 'ayan ho gae

ek tera raaz-e-ulfat chhupate hue

yun guzarta raha karwan-e-hayat

KHud se apna ta'aruf karaate hue