آخری ضرب دل پر لگاتے ہوئے

آخری ضرب دل پر لگاتے ہوئے

کون رخصت ہوا مسکراتے ہوئے

ان کی دہلیز تک ہم گئے تو مگر

دستکیں راستوں میں لٹاتے ہوئے

کہہ گئی تھی صبا یہ مرے کان میں

پھر ادھر آؤں گی آتے جاتے ہوئے

دل لگانے کو سارا جہاں تھا مگر

سوچتا کون ہے دل لگاتے ہوئے

زندگی کی طوالت کا عقدہ کھلا

ریت پر اک گھروندا بناتے ہوئے

کچھ ستارے تھے روشن جبیں پر مری

تم نے دیکھا نہیں جھلملاتے ہوئے

کتنے رشتوں کا میں نے بھرم رکھ لیا

اک تعلق سے دامن چھڑاتے ہوئے

کتنے ہی راز سب پر عیاں ہو گئے

اک ترا راز الفت چھپاتے ہوئے

یوں گزرتا رہا کاروان حیات

خود سے اپنا تعارف کراتے ہوئے