aalam-e-rozgar se marub ho gae

ālām-e-rozgār se mar'ūb ho ga.e

saare usuul 'ishq ke mā’yūb ho ga.e

shāyad maiñ apne aap se ġhāfil na rah sakā

kuchh log merī zaat se mansūb ho ga.e

pahle-pahal to ham pe tirā kuchh asar huā

phir dekhte hī dekhte maġhlūb ho ga.e

pohñchā na kuchh hamārā kahā un ke zauq tak

samjhe the ham ki sāhib-e-uslūb ho ga.e

shohrat kī sādgī ne bhī kyā kyā na kuchh kiyā

kitne hī badtarīn the jo ḳhuub ho ga.e

terā firāq bā'is-e-kaif-o-nashāt thā

duniyā tire visāl meñ majzūb ho ga.e

'ahmar' kā kyā banā koī pūchhe to ye kaho

nazr-e-sitam-zarīfī-e-mahbūb ho ga.e

aalam-e-rozgar se mar'ub ho gae

sare usul 'ishq ke ma’yub ho gae

shayad main apne aap se ghafil na rah saka

kuchh log meri zat se mansub ho gae

pahle-pahal to hum pe tera kuchh asar hua

phir dekhte hi dekhte maghlub ho gae

pohncha na kuchh hamara kaha un ke zauq tak

samjhe the hum ki sahib-e-uslub ho gae

shohrat ki sadgi ne bhi kya kya na kuchh kiya

kitne hi badtarin the jo KHub ho gae

tera firaq ba'is-e-kaif-o-nashat tha

duniya tere visal mein majzub ho gae

'ahmar' ka kya bana koi puchhe to ye kaho

nazr-e-sitam-zarifi-e-mahbub ho gae