aalam-o-ranj-o-gham ki tabhi lab-kushai thi

ālām-o-ranj-o-ġham kī tabhī lab-kushā.ī thī

jab sāhiloñ pe ashkoñ ne bastī basā.ī thī

dariyā chamak rahā thā sitāroñ ke zor par

ik raat kahkashāñ ne kahānī sunā.ī thī

dil meñ yaqīn hai ki ye be daaġh kā.enāt

is ittifāq ne nahīñ rab ne banā.ī thī

kis ne udāsiyoñ se ye shāmeñ nikālī haiñ

kis ne ḳhamoshiyoñ se ye vaadī sajā.ī thī

tannāzī-e-jamāl thā vo tumtarāq-e-husn

chehre pe ḳhaak ishq kī jalva-numā.ī thī

mujh ko gumāñ huā thā dhuāñ dekh kar vahāñ

us tāqche meñ sirf diye kī dahā.ī thī

maiñ us ke sāmne se guzar ke gayā to 'john'

nazreñ nahīñ milīñ thiiñ faqat ham-navā.ī thī

aalam-o-ranj-o-gham ki tabhi lab-kushai thi

jab sahilon pe ashkon ne basti basai thi

dariya chamak raha tha sitaron ke zor par

ek raat kahkashan ne kahani sunai thi

dil mein yaqin hai ki ye be dagh kaenat

is ittifaq ne nahin rab ne banai thi

kis ne udasiyon se ye shamen nikali hain

kis ne KHamoshiyon se ye wadi sajai thi

tannazi-e-jamal tha wo tumtaraq-e-husn

chehre pe KHak ishq ki jalwa-numai thi

mujh ko guman hua tha dhuan dekh kar wahan

us taqche mein sirf diye ki dahai thi

main us ke samne se guzar ke gaya to 'john'

nazren nahin milin thin faqat ham-nawai thi