aalam-e-be-chehragi mein kaun kis ka aashna

ālam-e-be-chehragī meñ kaun kis kā āshnā

aaj kā har lafz hai mafhūm se nā-āshnā

kaun hotā hai zamāne meñ kisī kā āshnā

log honā chāhte haiñ ḳhud zamāna-āshnā

sochtā huuñ kaun sī manzil hai ye idrāk kī

zarra zarra āshnā hai pattā pattā āshnā

chaaT jaatī hai jinheñ sūraj kī pyāsī raushnī

kaash ho jaa.eñ kisī din vo bhī dariyā-āshnā

tishnagī aa.ī sarāboñ se guzar kar aab tak

sāhil-e-dariyā magar ab tak hai sahrā-āshnā

zauq-e-ḳhud-bīnī kī taskīn-e-anā ke vāste

kitne hī nā-āshnāoñ ko banāyā āshnā

kaash ho jaa.e tirī āñkhoñ pe ḳhvāboñ kā nuzūl

kaash ho jaa.e tirā dil bhī tamannā-āshnā

kaun pahchānegā ham ko kaun pūchhegā mizāj

kaun hai apne sivā 'qaisar' hamārā āshnā

aalam-e-be-chehragi mein kaun kis ka aashna

aaj ka har lafz hai mafhum se na-ashna

kaun hota hai zamane mein kisi ka aashna

log hona chahte hain KHud zamana-ashna

sochta hun kaun si manzil hai ye idrak ki

zarra zarra aashna hai patta patta aashna

chaT jati hai jinhen suraj ki pyasi raushni

kash ho jaen kisi din wo bhi dariya-ashna

tishnagi aai sarabon se guzar kar aab tak

sahil-e-dariya magar ab tak hai sahra-ashna

zauq-e-KHud-bini ki taskin-e-ana ke waste

kitne hi na-ashnaon ko banaya aashna

kash ho jae teri aankhon pe KHwabon ka nuzul

kash ho jae tera dil bhi tamanna-ashna

kaun pahchanega hum ko kaun puchhega mizaj

kaun hai apne siwa 'qaisar' hamara aashna