aalam-e-yas mein ghabrae na insan bahut

ālam-e-yās meñ ghabrā.e na insān bahut

dil salāmat hai to hasrat bahut armān bahut

kaash do chaar hazāroñ meñ to hoñ kāfir-e-ishq

ham ne ka.abe meñ bhī dekhe na musalmān bahut

sar uThātā nahīñ tū sharm-e-jafā se zālim

yā kiye haiñ kisī kam-baḳht ne ehsān bahut

tum ki bedād karo aur na sharmāo zarā

ham ki nā-karda-gunah aur pashemān bahut

hasrateñ roz na.ī dil meñ bharī jaatī haiñ

thoḌe thoḌe bhī hue jaate haiñ mehmān bahut

sochiye dil meñ to hai ishq nihāyat dushvār

na samajhiye to yahī kaam hai āsān bahut

bazm-e-ahbāb meñ ai 'dāġh' kabhī to hañs bol

dekhte haiñ tujhe har vaqt pareshān bahut

aalam-e-yas mein ghabrae na insan bahut

dil salamat hai to hasrat bahut arman bahut

kash do chaar hazaron mein to hon kafir-e-ishq

hum ne kabe mein bhi dekhe na musalman bahut

sar uThata nahin tu sharm-e-jafa se zalim

ya kiye hain kisi kam-baKHt ne ehsan bahut

tum ki bedad karo aur na sharmao zara

hum ki na-karda-gunah aur pasheman bahut

hasraten roz nai dil mein bhari jati hain

thoDe thoDe bhi hue jate hain mehman bahut

sochiye dil mein to hai ishq nihayat dushwar

na samajhiye to yahi kaam hai aasan bahut

bazm-e-ahbab mein ai 'dagh' kabhi to hans bol

dekhte hain tujhe har waqt pareshan bahut