عالم ہو کوئی صاحب کردار ملیں گے

عالم ہو کوئی صاحب کردار ملیں گے

ہم اہل محبت ہیں وفادار ملیں گے

شیدائی وطن کے ہوں کہ کندن سے بدن کے

دیوانے سدا سرخیٔ اخبار ملیں گے

دنیا انہیں دیوانہ سمجھتی ہے تو سمجھے

ذہن ان کے تری راہ میں بیدار ملیں گے

جس گھر میں ترے چاہنے والے نظر آئیں

اس گھر کے معطر در و دیوار ملیں گے

غم کے ہوں خوشی کے ہوں خرد کے کہ جنوں کے

بن اس کے سبھی راستے دشوار ملیں گے

شہرت کی جنہیں بھوک نہ دولت کی ہوس ہو

اس دور میں ایسے کہاں فنکار ملیں گے

ان کو کوئی طوفان کہاں روک سکا ہے

گلشنؔ ہو یقیں جن کو وہ اس پار ملیں گے