aalam ki mushkilat ko aasan banaiye

aalam kī mushkilāt ko āsāñ banā.iye

ab dard-e-dil ko māya-e-īmāñ banā.iye

yā kījiye na shikva-e-be-lutfī-e-ḳhalish

yā dil ke laḳht laḳht ko paikāñ banā.iye

yā ārzū-e-lutf-o-karam tark kījiye

yā hāl-e-dard qābil-e-darmāñ banā.iye

yā muñh na moḌiye kabhī ālām-e-dahr se

yā zindagī ko be-sar-o-sāmāñ banā.iye

aane hī ko hai manzil-e-maqsūd kī ḳhabar

shīrāza-e-hayāt pareshāñ banā.iye

āsāniyoñ ko mojib-e-āfāt jāniye

dushvāriyoñ ko vaj.h-e-sad-imakāñ banā.iye

jalvoñ ko qaid-e-rasm se āzād kījiye

aalam ko har nigāh meñ hairāñ banā.iye

taklīf kījiye kabhī 'hirmāñ' ke haal par

ik be-navā ko banda-e-ehsāñ banā.iye

aalam ki mushkilat ko aasan banaiye

ab dard-e-dil ko maya-e-iman banaiye

ya kijiye na shikwa-e-be-lutfi-e-KHalish

ya dil ke laKHt laKHt ko paikan banaiye

ya aarzu-e-lutf-o-karam tark kijiye

ya haal-e-dard qabil-e-darman banaiye

ya munh na moDiye kabhi aalam-e-dahr se

ya zindagi ko be-sar-o-saman banaiye

aane hi ko hai manzil-e-maqsud ki KHabar

shiraaza-e-hayat pareshan banaiye

aasaniyon ko mojib-e-afat jaaniye

dushwariyon ko wajh-e-sad-imakan banaiye

jalwon ko qaid-e-rasm se aazad kijiye

aalam ko har nigah mein hairan banaiye

taklif kijiye kabhi 'hirman' ke haal par

ek be-nawa ko banda-e-ehsan banaiye