aalam mein husn tera mashhur jaante hain

aalam meñ husn terā mash.hūr jānte haiñ

arz o samā kā us ko ham nuur jānte haiñ

har-chand do jahāñ se ab ham guzar ga.e haiñ

tis par bhī dil ke ghar ko ham duur jānte haiñ

jis meñ tirī razā ho vo hī qubūl karnā

apnā to ham yahī kuchh maqdūr jānte haiñ

sau rañg jalvagar haiñ garche butān-e-ālam

ham ek tujhi ko apnā manzūr jānte haiñ

labrez-e-mai haiñ garche sāġhar kī tarah har dam

tis par bhī aap ko ham maḳhmūr jānte haiñ

kuchh aur aarzū kī hargiz nahīñ samā.ī

az bas tujhi ko dil meñ māmūr jānte haiñ

'īmān' jis ke dil meñ hai yaad us kī har dam

ham to usī kī ḳhātir masrūr jānte haiñ

aalam mein husn tera mashhur jaante hain

arz o sama ka us ko hum nur jaante hain

har-chand do jahan se ab hum guzar gae hain

tis par bhi dil ke ghar ko hum dur jaante hain

jis mein teri raza ho wo hi qubul karna

apna to hum yahi kuchh maqdur jaante hain

sau rang jalwagar hain garche butan-e-alam

hum ek tujhi ko apna manzur jaante hain

labrez-e-mai hain garche saghar ki tarah har dam

tis par bhi aap ko hum maKHmur jaante hain

kuchh aur aarzu ki hargiz nahin samai

az bas tujhi ko dil mein mamur jaante hain

'iman' jis ke dil mein hai yaad us ki har dam

hum to usi ki KHatir masrur jaante hain