عام سا اک شخص ہے یہ فرحت احساسؔ آپ کا

عام سا اک شخص ہے یہ فرحت احساسؔ آپ کا

عشق نے اس کو بنایا ہے مگر خاص آپ کا

آپ تنہائی میں کب ملتے ہیں کچھ تو بولئے

ختم کب ہوتا ہے آئینے میں اجلاس آپ کا

اور کتنا پاس آؤں میں کہ پاس آ جائیں آپ

کچھ تو کہیے اور کتنی دور ہے پاس آپ کا

صاحبا ہم کو گلے سے بھی لگا لیجے کبھی

کب تلک قدموں میں ہی بیٹھا رہے داس آپ کا

گوشت میرے جسم کا تاریک ہو جاتا ہے کیوں

شام آتے ہی دمک اٹھتا ہے کیوں ماس آپ کا

وہ جو ہیں اک جوہری سے فرحت اللہ خانؔ ہیں

یہ لفنگا جو ہے یہ ہے فرحت احساسؔ آپ کا