آمد یار کی آئی جو خبر ہولے سے

آمد یار کی آئی جو خبر ہولے سے

کھل گئے میری تمناؤں کے پر ہولے سے

ایک طوفان اٹھائے ہوئے بیٹھا ہے یہاں

وہ مرے دل میں گیا تھا جو اتر ہولے سے

شور کیونکر تو مچاتا ہے مسیحا یہ بتا

دیکھ بیمار گیا ہے ترا مر ہولے سے

راکھ سمجھے ہے محبت کو یہ دنیا جو کبھی

رقص کرتا ہے کہیں کوئی شرر ہولے سے

کاش مل جائے مجھے میری دعاؤں کا صلہ

کاش کھل جائے کسی روز وہ در ہولے سے

کیا ہوا ہے کہ ترے بعد مہ و سال مرے

بن چھوئے ہی مجھے جاتے ہیں گزر ہولے سے

راہ دشوار سہی ساتھ تمہارا ہو اگر

یار کٹ جائے گا سانسوں کا سفر ہولے سے

خار تب سے ہی نظر میں ہے سبھی کی افضلؔ

آپ نے جب سے ہے کی اس پہ نظر ہولے سے