aamad-e-yar ki aai jo KHabar haule se

āmad-e-yār kī aa.ī jo ḳhabar haule se

khul ga.e merī tamannāoñ ke par haule se

ek tūfān uThā.e hue baiThā hai yahāñ

vo mire dil meñ gayā thā jo utar haule se

shor kyūñkar tū machātā hai masīhā ye batā

dekh bīmār gayā hai tirā mar haule se

raakh samjhe hai mohabbat ko ye duniyā jo kabhī

raqs kartā hai kahīñ koī sharar haule se

kaash mil jaa.e mujhe merī duāoñ kā sila

kaash khul jaa.e kisī roz vo dar haule se

kyā huā hai ki tire ba.ad mah-o-sāl mire

bin chhue hī mujhe jaate haiñ guzar haule se

raah dushvār sahī saath tumhārā ho agar

yaar kaT jā.egā sāñsoñ kā safar haule se

ḳhaar tab se hī nazar meñ hai sabhī kī 'afzal'

aap ne jab se hai kī us pe nazar haule se

aamad-e-yar ki aai jo KHabar haule se

khul gae meri tamannaon ke par haule se

ek tufan uThae hue baiTha hai yahan

wo mere dil mein gaya tha jo utar haule se

shor kyunkar tu machata hai masiha ye bata

dekh bimar gaya hai tera mar haule se

rakh samjhe hai mohabbat ko ye duniya jo kabhi

raqs karta hai kahin koi sharar haule se

kash mil jae mujhe meri duaon ka sila

kash khul jae kisi roz wo dar haule se

kya hua hai ki tere baad mah-o-sal mere

bin chhue hi mujhe jate hain guzar haule se

rah dushwar sahi sath tumhaara ho agar

yar kaT jaega sanson ka safar haule se

KHar tab se hi nazar mein hai sabhi ki 'afzal'

aap ne jab se hai ki us pe nazar haule se