aan kar gham-kada-e-dahr mein jo baiThe hum

aan kar ġham-kada-e-dahr meñ jo baiThe ham

sham.a saañ apne ta.iiñ aap hī ro baiThe ham

ishq ke haath se kashtī-e-shikasta kī tarah

aap apne ta.iiñ ro ro ke Dubo baiThe ham

gar yahī tere ishāre haiñ to majlis se tirī

kui na kui aa ke uThā devegā go baiThe ham

tum jo uThne ko hue the to chale the ham bhī

ab jo yuuñ aap kī marzī hai to lo baiThe ham

siina ḳhālī nahīñ hotā hai na thamte haiñ ashk

kab se rote haiñ dil-e-ḳhūñ-shuda ko baiThe ham

ġhair kahte haiñ ki ham baiThne deveñge na yaañ

ab to is zid se jo kuchh hove so ho baiThe ham

ashk ā.ankhoñ se to ma.adūm hue the kad ke

haath ab girya-e-ḳhūnī se bhī dho baiThe ham

aur to kuchh nahīñ yaañ itnā ḳhafā hote ho kyuuñ

kyā huā aap ke nazdīk jo ho baiThe ham

aarzū dil kī bar aa.ī na 'hasan' vasl meñ aur

lazzat-e-hijr ko bhī muft meñ kho baiThe ham

aan kar gham-kada-e-dahr mein jo baiThe hum

shama san apne tain aap hi ro baiThe hum

ishq ke hath se kashti-e-shikasta ki tarah

aap apne tain ro ro ke Dubo baiThe hum

gar yahi tere ishaare hain to majlis se teri

kui na kui aa ke uTha dewega go baiThe hum

tum jo uThne ko hue the to chale the hum bhi

ab jo yun aap ki marzi hai to lo baiThe hum

sina KHali nahin hota hai na thamte hain ashk

kab se rote hain dil-e-KHun-shuda ko baiThe hum

ghair kahte hain ki hum baiThne dewenge na yan

ab to is zid se jo kuchh howe so ho baiThe hum

ashk aaankhon se to madum hue the kad ke

hath ab girya-e-KHuni se bhi dho baiThe hum

aur to kuchh nahin yan itna KHafa hote ho kyun

kya hua aap ke nazdik jo ho baiThe hum

aarzu dil ki bar aai na 'hasan' wasl mein aur

lazzat-e-hijr ko bhi muft mein kho baiThe hum