aan se zalim ka imtihan aur main

aañ se zālim kā imtihāñ aur maiñ

ye sitam tere āsmāñ aur maiñ

kabhī kahtā huuñ ab vo aate haiñ

kabhī kahtā huuñ vo kahāñ aur maiñ

be-qarārī dilā rahī hai yaad

haa.e vo terī shoḳhiyāñ aur maiñ

nahīñ suntā koī kisī kī jahāñ

ġham-e-hijrāñ kī dāstāñ aur maiñ

āḳhir aa hī ga.ī fuġhāñ lab par

zabt-e-rāz-e-ġham-e-nihāñ aur maiñ

charḳh bhūlā huā hai kyā gardish

yaar ke ghar meñ mehmāñ aur maiñ

kuchh kahe jaao kuchh sune jaao

tum se do-chār bad-gumāñ aur maiñ

vo galī aur rāt-bhar phirnā

dūr-bāsh-e-nigah yaañ aur maiñ

fikr-e-dushvārī-e-matālib meñ

ek bechāra rāzdāñ aur maiñ

aa.ine varna dekh lījiyegā

har jagah aap kā bayāñ aur maiñ

pūchh 'sālik' na merā ghar mujh se

rāt-din hai dar-e-butāñ aur maiñ

aan se zalim ka imtihan aur main

ye sitam tere aasman aur main

kabhi kahta hun ab wo aate hain

kabhi kahta hun wo kahan aur main

be-qarari dila rahi hai yaad

hae wo teri shoKHiyan aur main

nahin sunta koi kisi ki jahan

gham-e-hijran ki dastan aur main

aaKHir aa hi gai fughan lab par

zabt-e-raaz-e-gham-e-nihan aur main

charKH bhula hua hai kya gardish

yar ke ghar mein mehman aur main

kuchh kahe jao kuchh sune jao

tum se do-chaar bad-guman aur main

wo gali aur raat-bhar phirna

dur-bash-e-nigah yan aur main

fikr-e-dushwari-e-matalib mein

ek bechaara raazdan aur main

aaine warna dekh lijiyega

har jagah aap ka bayan aur main

puchh 'salik' na mera ghar mujh se

raat-din hai dar-e-butan aur main