aana hai yun muhaal to ek shab ba-KHwab aa

aanā hai yuuñ muhāl to ik shab ba-ḳhvāb aa

mujh tak ḳhudā ke vāste zālim shitāb aa

detā huuñ naama maiñ tujhe is shart par abhī

qāsid tū us ke paas se le kar javāb aa

aisā hī azm hai tujhe gar kū-e-yār kā

chaltā huuñ maiñ bhī ai dil-e-pur-iztirāb aa

ye ḳhasta chashm vā hai tire intizār meñ

ai sub.h muñh dikhā kahīñ ai āftāb aa

tā ye shab-e-firāq kī dījūr duur ho

ai rashk-e-māh ghar meñ mire be-naqāb aa

āb-e-ravāñ o sabza o rū-e-nigār hai

saaqī shitāb aise meñ le kar sharāb aa

ro.eñ gale se lag ke baham ḳhuub koī dam

kyā dekhtā hai ai dil-e-be-sabr-o-tāb aa

bahr-e-jahāñ meñ der-shud aamad ravā nahīñ

mānind-e-qatra jā tū ba-rañg-e-hubāb aa

qurbānī aaj dar pe tire karnī hai mujhe

le kar ke teġh to bhī barā.e-savāb aa

shāyad vo tujh ko dekh ke ġham khaa.e 'mus.hafī'

tū us ke sāmne to ba-chashm-e-pur-āb aa

aana hai yun muhaal to ek shab ba-KHwab aa

mujh tak KHuda ke waste zalim shitab aa

deta hun nama main tujhe is shart par abhi

qasid tu us ke pas se le kar jawab aa

aisa hi azm hai tujhe gar ku-e-yar ka

chalta hun main bhi ai dil-e-pur-iztirab aa

ye KHasta chashm wa hai tere intizar mein

ai subh munh dikha kahin ai aaftab aa

ta ye shab-e-firaq ki dijur dur ho

ai rashk-e-mah ghar mein mere be-naqab aa

aab-e-rawan o sabza o ru-e-nigar hai

saqi shitab aise mein le kar sharab aa

roen gale se lag ke baham KHub koi dam

kya dekhta hai ai dil-e-be-sabr-o-tab aa

bahr-e-jahan mein der-shud aamad rawa nahin

manind-e-qatra ja tu ba-rang-e-hubab aa

qurbani aaj dar pe tere karni hai mujhe

le kar ke tegh to bhi barae-sawab aa

shayad wo tujh ko dekh ke gham khae 'mushafi'

tu us ke samne to ba-chashm-e-pur-ab aa