aana tha jise aaj wo aaya to nahin hai

aanā thā jise aaj vo aayā to nahīñ hai

ye vaqt badalne kā ishārā to nahīñ hai

dāvat de kabhī kyuuñ vo mohabbat se bulā.e

dariyā se mirī pyaas kā rishta to nahīñ hai

ye kaun gayā hai ki jhapaktī nahīñ āñkheñ

raste meñ vo Thahrā huā lamha to nahīñ hai

hañstā huā chehra hai damaktā huā paikar

guzrā huā ye merā zamāna to nahīñ hai

āñkhoñ ne abhī niiñd kā dāman nahīñ chhoḌā

ḳhvāboñ se bharosa abhī TuuTā to nahīñ hai

dariyā meñ sar-e-shām hai Duubā huā sūraj

din-bhar kā musāfir koī pyāsā to nahīñ hai

chhoḌ aa.e ho jis ke liye āñchal kī ghanī chhāñv

is shahr meñ vo dhuup kā TukḌā to nahīñ hai

raste meñ 'fahīm' us kī tabī.at kā bigaḌnā

ghar jaane kā ik aur bahāna to nahīñ hai

aana tha jise aaj wo aaya to nahin hai

ye waqt badalne ka ishaara to nahin hai

dawat de kabhi kyun wo mohabbat se bulae

dariya se meri pyas ka rishta to nahin hai

ye kaun gaya hai ki jhapakti nahin aankhen

raste mein wo Thahra hua lamha to nahin hai

hansta hua chehra hai damakta hua paikar

guzra hua ye mera zamana to nahin hai

aankhon ne abhi nind ka daman nahin chhoDa

KHwabon se bharosa abhi TuTa to nahin hai

dariya mein sar-e-sham hai Duba hua suraj

din-bhar ka musafir koi pyasa to nahin hai

chhoD aae ho jis ke liye aanchal ki ghani chhanw

is shahr mein wo dhup ka TukDa to nahin hai

raste mein 'fahim' us ki tabiat ka bigaDna

ghar jaane ka ek aur bahana to nahin hai