aanch to diye ki thi sardiyon ki shamon mein

aañch to diye kī thī sardiyoñ kī shāmoñ meñ

varna dhuup kab utrī sardiyoñ kī shāmoñ meñ

haath se kabūtar to phir uḌā diyā maiñ ne

rah ga.ī hai tanhā.ī sardiyoñ kī shāmoñ meñ

hijr aur hijrat ko oḌh kar bhī dekhā hai

saañs tak na chaltī thī sardiyoñ kī shāmoñ meñ

sard garm lamhoñ kī aag tāpte the ham

vo jo ik rasoī thī sardiyoñ kī shāmoñ meñ

aaj der tak sulgī terī yaad kī ḳhushbū

dil kī baat dil se thī sardiyoñ kī shāmoñ meñ

aanch to diye ki thi sardiyon ki shamon mein

warna dhup kab utri sardiyon ki shamon mein

hath se kabutar to phir uDa diya main ne

rah gai hai tanhai sardiyon ki shamon mein

hijr aur hijrat ko oDh kar bhi dekha hai

sans tak na chalti thi sardiyon ki shamon mein

sard garm lamhon ki aag tapte the hum

wo jo ek rasoi thi sardiyon ki shamon mein

aaj der tak sulgi teri yaad ki KHushbu

dil ki baat dil se thi sardiyon ki shamon mein