آندھی چلی جو ریت کی سارا بدل گیا

آندھی چلی جو ریت کی سارا بدل گیا

صحرا کا ایک پل میں نظارہ بدل گیا

پھر سے ادھر نہ جانے کی تاکید دل نے کی

پر کیا کریں مزاج دوبارہ بدل گیا

تھوڑی سی فیصلے کی میسر ہو مہلتیں

سمجھیں تو اس سے پہلے اشارہ بدل گیا

تھا رنگ دھوپ کا تو برابر کھلا ہوا

بادل مگر نصیب کا مارا بدل گیا

لب بند تھے تو بات تھی کوئی بندھی ہوئی

کھلتے ہی جو بھرم تھا ہمارا بدل گیا

اب تو جہاں بھی دیکھو ہے دلدل کا سامنا

جس کا کنارہ سمجھے کنارہ بدل گیا

پرویزؔ آسمان کا منظر تو صاف تھا

دامن گھٹا نے جیسے پسارا بدل گیا