aandhi chali jo ret ki sara badal gaya

āñdhī chalī jo ret kī saarā badal gayā

sahrā kā ek pal meñ nazāra badal gayā

phir se udhar na jaane kī tākīd dil ne kī

par kyā kareñ mizāj dobāra badal gayā

thoḌī sī faisle kī mayassar ho mohlateñ

samjheñ to is se pahle ishāra badal gayā

thā rang dhuup kā to barābar khilā huā

bādal magar nasīb kā maarā badal gayā

lab band the to baat thī koī bañdhī huī

khulte hī jo bharam thā hamārā badal gayā

ab to jahāñ bhī dekho hai daldal kā sāmnā

jis kā kināra samjhe kināra badal gayā

'parvez' āsmān kā manzar to saaf thā

dāman ghaTā ne jaise pasārā badal gayā

aandhi chali jo ret ki sara badal gaya

sahra ka ek pal mein nazara badal gaya

phir se udhar na jaane ki takid dil ne ki

par kya karen mizaj dobara badal gaya

thoDi si faisle ki mayassar ho mohlaten

samjhen to is se pahle ishaara badal gaya

tha rang dhup ka to barabar khila hua

baadal magar nasib ka mara badal gaya

lab band the to baat thi koi bandhi hui

khulte hi jo bharam tha hamara badal gaya

ab to jahan bhi dekho hai daldal ka samna

jis ka kinara samjhe kinara badal gaya

'parwez' aasman ka manzar to saf tha

daman ghaTa ne jaise pasara badal gaya