aandhi mein bisat ulaT gai hai

āñdhī meñ bisāt ulaT ga.ī hai

ghanghor ghaTā bhī chhaT ga.ī hai

vo gard uḌaa.ī hai dukhoñ ne

dīvār-e-hayāt aT ga.ī hai

ḳhanjar kī tarah thī reg-e-sahrā

ḳheme kī tanāb kaT ga.ī hai

mīrās-e-gulāb thī jo ḳhushbū

jhoñkoñ meñ havā ke baT ga.ī hai

pyāsoñ kā hujūm rah gayā hai

ik tiir se mushk phaT ga.ī hai

ik aur bhī din guzar gayā hai

mī.ād-e-azāb ghaT ga.ī hai

sāhil kī baḌhā ke tishnagī mauj

dariyā kī taraf palaT ga.ī hai

phailāuñgā paañv kyā maiñ 'gulzār'

chādar hī mirī simaT ga.ī hai

aandhi mein bisat ulaT gai hai

ghanghor ghaTa bhi chhaT gai hai

wo gard uDai hai dukhon ne

diwar-e-hayat aT gai hai

KHanjar ki tarah thi reg-e-sahra

KHeme ki tanab kaT gai hai

miras-e-gulab thi jo KHushbu

jhonkon mein hawa ke baT gai hai

pyason ka hujum rah gaya hai

ek tir se mushk phaT gai hai

ek aur bhi din guzar gaya hai

miad-e-azab ghaT gai hai

sahil ki baDha ke tishnagi mauj

dariya ki taraf palaT gai hai

phailaunga panw kya main 'gulzar'

chadar hi meri simaT gai hai