aandhiyon se hain rabte uske

āñdhiyoñ se haiñ rābte us ke

jal rahe haiñ sabhī diye us ke

ḳhushbueñ kar rahī haiñ us kā tavāf

baaġh sab haiñ hare-bhare us ke

vo sarāpā hai āftāb-e-jamāl

kaun Thahregā sāmne us ke

mujh se pahchānte haiñ log us ko

aks mere haiñ aa.ine us ke

maiñ kitāb us kī zindagī kī huuñ

mujh meñ raushan haiñ hāshiye us ke

shab ke zindāñ meñ qaid hai vo magar

haiñ ujāloñ se rābte us ke

us ke har zāviye se vāqif huuñ

maiñ ne khīñche haiñ zā.iche us ke

aaj tak naam de sakā na koī

haiñ ta.alluq ajab mire us ke

aandhiyon se hain rabte us ke

jal rahe hain sabhi diye us ke

KHushbuen kar rahi hain us ka tawaf

bagh sab hain hare-bhare us ke

wo sarapa hai aaftab-e-jamal

kaun Thahrega samne us ke

mujh se pahchante hain log us ko

aks mere hain aaine us ke

main kitab us ki zindagi ki hun

mujh mein raushan hain hashiye us ke

shab ke zindan mein qaid hai wo magar

hain ujalon se rabte us ke

us ke har zawiye se waqif hun

main ne khinche hain zaiche us ke

aaj tak nam de saka na koi

hain talluq ajab mere us ke