aane wale dinon ko bhi hum ji chuke ab yahan koi mausam anokha nahin

aane vaale dinoñ ko bhī ham jī chuke ab yahāñ koī mausam anokhā nahīñ

aao ab apne bistar lapeTeñ chalo ek aise nagar meñ jo dekhā nahīñ

ishtihāroñ ke be-barg sahrā meñ ab gum-shuda lazzateñ DhūñDhtī hai zabāñ

ai zamīñ tere dāman meñ vo phal bhī hai zā.iqa jis kā duniyā ne chakkhā nahīñ

pattiyāñ jhaḌ ga.iiñ phuul murjhā ga.e kitnā sunsān hai peḌ ehsās kā

us kī shāḳhoñ pe jis kā baserā thā kal vo parinda bhī to aaj lauTā nahīñ

jis ko dushman kahūñ koī aisā nahīñ ab to jo bhī hai merā bahī-ḳhvāh hai

ye jo har saañs piine pe majbūr huuñ maiñ ne ye zahr ḳhud to ḳharīdā nahīñ

apne purkhoñ kā vāris huuñ phirtā huuñ maiñ dar-ba-dar apnī jholī meñ Daale hue

saare sikke jo Taksāl bāhar hue saare alfāz vo jin ke mā'nā nahīñ

aane wale dinon ko bhi hum ji chuke ab yahan koi mausam anokha nahin

aao ab apne bistar lapeTen chalo ek aise nagar mein jo dekha nahin

ishtihaaron ke be-barg sahra mein ab gum-shuda lazzaten DhunDhti hai zaban

ai zamin tere daman mein wo phal bhi hai zaiqa jis ka duniya ne chakkha nahin

pattiyan jhaD gain phul murjha gae kitna sunsan hai peD ehsas ka

us ki shaKHon pe jis ka basera tha kal wo parinda bhi to aaj lauTa nahin

jis ko dushman kahun koi aisa nahin ab to jo bhi hai mera bahi-KHwah hai

ye jo har sans pine pe majbur hun main ne ye zahr KHud to KHarida nahin

apne purkhon ka waris hun phirta hun main dar-ba-dar apni jholi mein Dale hue

sare sikke jo Taksal bahar hue sare alfaz wo jin ke ma'na nahin