آنے والے دنوں کو بھی ہم جی چکے اب یہاں کوئی موسم انوکھا نہیں

آنے والے دنوں کو بھی ہم جی چکے اب یہاں کوئی موسم انوکھا نہیں

آؤ اب اپنے بستر لپیٹیں چلو ایک ایسے نگر میں جو دیکھا نہیں

اشتہاروں کے بے برگ صحرا میں اب گمشدہ لذتیں ڈھونڈھتی ہے زباں

اے زمیں تیرے دامن میں وہ پھل بھی ہے ذائقہ جس کا دنیا نے چکھا نہیں

پتیاں جھڑ گئیں پھول مرجھا گئے کتنا سنسان ہے پیڑ احساس کا

اس کی شاخوں پہ جس کا بسیرا تھا کل وہ پرندہ بھی تو آج لوٹا نہیں

جس کو دشمن کہوں کوئی ایسا نہیں اب تو جو بھی ہے میرا بہی خواہ ہے

یہ جو ہر سانس پینے پہ مجبور ہوں میں نے یہ زہر خود تو خریدا نہیں

اپنے پرکھوں کا وارث ہوں پھرتا ہوں میں دربدر اپنی جھولی میں ڈالے ہوئے

سارے سکے جو ٹکسال باہر ہوئے سارے الفاظ وہ جن کے معنی نہیں