aane wale lamhon ki raushni ko likhna hai

aane vaale lamhoñ kī raushnī ko likhnā hai

ek na.ī ibārat meñ zindagī ko likhnā hai

bolne lageñ apne ghar ke sab dar-o-dīvār

jo sunā.ī de aisī ḳhāmushī ko likhnā hai

ek hasīn bachche kī kyā hasīn ḳhvāhish hai

chāñd kī taraf se ḳhat chāñdnī ko likhnā hai

ek do kī koshish se vaqt kaise badlegā

apne vaqt kī qismat ham sabhī ko likhnā hai

apnī shaḳhsiyat āḳhir kyoñ asar nahīñ rakhtī

aaj apne andar kī is kamī ko likhnā hai

lafz lafz ho jis kā phuul kī tarah 'sājid'

aisī ḳhushbuoñ vaalī shā.irī ko likhnā hai

aane wale lamhon ki raushni ko likhna hai

ek nai ibarat mein zindagi ko likhna hai

bolne lagen apne ghar ke sab dar-o-diwar

jo sunai de aisi KHamushi ko likhna hai

ek hasin bachche ki kya hasin KHwahish hai

chand ki taraf se KHat chandni ko likhna hai

ek do ki koshish se waqt kaise badlega

apne waqt ki qismat hum sabhi ko likhna hai

apni shaKHsiyat aaKHir kyon asar nahin rakhti

aaj apne andar ki is kami ko likhna hai

lafz lafz ho jis ka phul ki tarah 'sajid'

aisi KHushbuon wali shairi ko likhna hai