aane wale sher pe rae bari bari baiThegi

aane vaale sher pe raa.e baarī baarī baiThegī

ab ki jo bhī nazm kahūñgā zehn pe saarī baiThegī

us ke liye poshāk banā.ūñgā maiñ apne hāthoñ se

rañg sapedī beach meñ hogā surḳh kanārī baiThegī

kam-go haiñ aur apnī aadat apnī fikr pe bhārī hai

varna jab bhī baat kareñge dhaak hamārī baiThegī

achchhe yāroñ kī sohbat meñ rahnā achchhā lagtā hai

log bure hoñge jab saare shar bāzārī baiThegī

dhīre chalnā thāme rahnā fikr-e-subuk-raftārī ko

raste meñ ik moḌ aa.egā aur savārī baiThegī

dil kī zamīñ par ham ne ik konā bhī ḳhālī chhoḌā hai

shaam ko vāpas aa kar jis meñ yaad tumhārī baiThegī

sher kī duniyā se maiñ bāhar niklūñ bhī to kyuuñ niklūñ

nashsha jab utregā merā merī ḳhumārī baiThegī

raat ko jo bhī ḳhvāb meñ dekhā sub.h vahī ta.abīr kiyā

agle roz bhī jāgnā hogā niiñd bichārī baiThegī

ziist hamārī thak jā.egī hijr ke lambe raste par

aur zarā sustāne ko bhī ye dukhiyārī baiThegī

mere bachāo kī to mere yaar hī kuchh tadbīr kareñ

aañkh se zarb lagī hai dil par zarb to kaarī baiThegī

aane wale sher pe rae bari bari baiThegi

ab ki jo bhi nazm kahunga zehn pe sari baiThegi

us ke liye poshak banaunga main apne hathon se

rang sapedi beach mein hoga surKH kanari baiThegi

kam-go hain aur apni aadat apni fikr pe bhaari hai

warna jab bhi baat karenge dhak hamari baiThegi

achchhe yaron ki sohbat mein rahna achchha lagta hai

log bure honge jab sare shar bazari baiThegi

dhire chalna thame rahna fikr-e-subuk-raftari ko

raste mein ek moD aaega aur sawari baiThegi

dil ki zamin par hum ne ek kona bhi KHali chhoDa hai

sham ko wapas aa kar jis mein yaad tumhaari baiThegi

sher ki duniya se main bahar niklun bhi to kyun niklun

nashsha jab utrega mera meri KHumari baiThegi

raat ko jo bhi KHwab mein dekha subh wahi tabir kiya

agle roz bhi jagna hoga nind bichaari baiThegi

zist hamari thak jaegi hijr ke lambe raste par

aur zara sustane ko bhi ye dukhiyari baiThegi

mere bachao ki to mere yar hi kuchh tadbir karen

aankh se zarb lagi hai dil par zarb to kari baiThegi