آنکھ جب آئنے میں پڑتی ہے

آنکھ جب آئنے میں پڑتی ہے

زندگی دیکھنے میں پڑتی ہے

روز کٹتی ہے فصل خوشبو کی

اور ترے تولیے میں پڑتی ہے

دن کسی معرکے میں کٹتا ہے

شب کسی مورچے میں پڑتی ہے

چھوڑ دنیا کی بات دل کی سن

چھوڑ کس وسوسے میں پڑتی ہے

تو نہیں ہے تو رات بھر بارش

جانے کس سلسلے میں پڑتی ہے

پاؤں کو لاکھ کھینچتا ہوں مگر

وہ گلی راستے میں پڑتی ہے

گردش وقت تیری آنکھ کے اس

پر کشش دائرے میں پڑتی ہے

عشق کے اور ہیں مکان و زماں

عمر اک ثانئے میں پڑتی ہے

زندگی تو وہاں بھی ہے اشرفؔ

برف جس منطقے میں پڑتی ہے