آنکھ خاموش نظر خالی ہے

آنکھ خاموش نظر خالی ہے

درد کی راہگزر خالی ہے

روشنی سمت بدلنے کو ہے

عرصۂ شمس و قمر خالی ہے

ہاں ملاقات کی ساعت ہے یہی

وقت کا پچھلا پہر خالی ہے

آرزو دل میں نہیں ہے کوئی

ایک مدت سے یہ گھر خالی ہے

اٹھتے جاتے ہیں خریدار جنوں

کیسۂ شعر و اثر خالی ہے

اب کسی دل میں نہیں شوق سفر

جادۂ شہر ہنر خالی ہے

دن گزرتا نظر آتا ہی نہیں

رنگ امکاں سے سحر خالی ہے

صرف دل ہی نہیں سنسان ضیاؔ

روش جاں بھی ادھر خالی ہے