آنکھ کس بے وفا سے لڑی ہے

آنکھ کس بے وفا سے لڑی ہے

زندگی کشمکش میں پڑی ہے

حال دل کا میں کیوں کر سناؤں

رات چھوٹی کہانی بڑی ہے

درد کا دل میں رہ رہ کے اٹھنا

قصۂ غم کی پہلی کڑی ہے

آ رہے ہیں وہ بہر عیادت

اور ادھر موت سر پر کھڑی ہے

کچھ دکھا جوہر عشق اے دل

سامنے امتحاں کی گھڑی ہے

مختصر کر لو افسانۂ غم

زندگی بس گھڑی دو گھڑی ہے

میری نظروں کو تڑپا رہی ہے

ان کے در پر جو چلمن پڑی ہے

سوچ کر اے حبیبؔ آگے بڑھنا

منزل عشق بے حد کڑی ہے