آنکھ کو دھوکہ دیا آخر مری رفتار نے

آنکھ کو دھوکہ دیا آخر مری رفتار نے

اور جا کر توڑ ڈالا سرخ سگنل کار نے

چار پل کے اک پڑاؤ نے مری تقسیم کی

جسم کھینچا منزلوں نے دل سرائے دار نے

میں کھڑا ہوں تو برابر میں کھڑے ہیں سب مرے

گر پڑوں تو ہر کوئی دوڑے گا مجھ کو مارنے

مسکرا کر کھینچ لیتے ہیں کوئی تصویر ہم

اس سے بڑھ کر کیا دیا ہے اب کسی تہوار نے

وقت کی سیڑھی پہ چڑھ کر دیکھنا ہے اس طرف

کیوں مری بینائی کو روکا ہے اس دیوار نے

بن ترے سب ٹھیک ہے لیکن مجھے اس شہر میں

لگ گئے ہیں ایسے ویسے لوگ بھی دھتکارنے

زندگی دراصل راشدؔ دو گھڑی کا کھیل ہے

کب جہاں کو چھوڑنا چاہا کسی کردار نے