aankh ko dhoka diya aaKHir meri raftar ne

aañkh ko dhoka diyā āḳhir mirī raftār ne

aur jā kar toḌ Daalā surḳh signal car ne

chaar pal ke ik paḌāv ne mirī taqsīm kī

jism khīñchā manziloñ ne dil sarā-e-dār ne

maiñ khaḌā huuñ to barābar meñ khaḌe haiñ sab mire

gir paḌūñ to har koī dauḌegā mujh ko mārne

muskurā kar khīñch lete haiñ koī tasvīr ham

is se baḌh kar kyā diyā hai ab kisī tehvār ne

vaqt kī sīḌhī pe chaḌh kar dekhnā hai us taraf

kyoñ mirī bīnā.ī ko rokā hai us dīvār ne

bin tire sab Thiik hai lekin mujhe is shahr meñ

lag ga.e haiñ aise vaise log bhī dhutkārne

zindagī dar-asl 'rāshid' do ghaḌī kā khel hai

kab jahāñ ko chhoḌnā chāhā kisī kirdār ne

aankh ko dhoka diya aaKHir meri raftar ne

aur ja kar toD Dala surKH signal car ne

chaar pal ke ek paDaw ne meri taqsim ki

jism khincha manzilon ne dil sara-e-dar ne

main khaDa hun to barabar mein khaDe hain sab mere

gir paDun to har koi dauDega mujh ko marne

muskura kar khinch lete hain koi taswir hum

is se baDh kar kya diya hai ab kisi tehwar ne

waqt ki siDhi pe chaDh kar dekhna hai us taraf

kyon meri binai ko roka hai us diwar ne

bin tere sab Thik hai lekin mujhe is shahr mein

lag gae hain aise waise log bhi dhutkarne

zindagi dar-asl 'rashid' do ghaDi ka khel hai

kab jahan ko chhoDna chaha kisi kirdar ne